Malayang Kwento

Pagsusulat ng maikling kwento  talaga ang sentro ng blog na ito . (Hindi nga siguro papasa bilang maikling kwento ang ilan sa mga likha dito. Tawagin  na lang natin silang maikling maikling kwento) .Mga kwentong  nagiging makabuluhan dahil sa pagpapakita nito ng tunay na mukha ng ating lipunan. Yan ang dahilan kung kaya’t “Malayang Kwento” ang titulo ng blog.  Naiiba ito sa mga  kwento na nababasa natin sa karaniwang libro o kaya’y websites o blogs sa internet  dahil ang mga kwento dito ay hindi lamang isinulat para magbigay aliw o magpahayag ng mga personal na karanasan kundi para magpakita ng katotohan, magbigay inspirasyon (sa mga kapwa ko aktibista at kabataan) at higit sa lahat ay magsulong ng pagbabago.

Ang lahat ng mga kwento dito ay nangyari sa tunay na buhay at batay sa karanasan kong personal , ng aking mga kaibigan at kapwa aktibista .May ilang pagbabago akong ginawa upang mapaganda ang aking paglalahad pero hindi ito nakaapekto sa esenya o kabuuan ng kwento.

*Aminado ako na hindi ako magaling na manunulat o kwentista kaya hindi ganoon kahusay ang “porma” na ginagamit ko sa pagsusulat. Nagsisimula pa lamang akong paunlarain ang aking mga paraan. Pinipilit kong pag-aralan ang mga traditional na paraan  ngunit asahan nyo rin na kakawala ako dito at bubuo ng mga alternatibo, makabago at malayang pamamaraan ng pagsusulat. *Mahirap din maging consistent sa paggawa ng kwento dahil minsan limitado ako sa karanasan, ideya at kakayahan kaya naisipan kong magsama pa ng ibang likha. Maglalagay ako ng ilang tula, larawan at opinyon hinggil sa mga napapanahong isyu ngunit ito ay nakabatay pa rin sa konsepto ng “Malayang Kwento”.

sana sa inyong pagbabasa…  isapa’y lumaya.